28.04.2007 28 აპრილი - მსოფლიოს თასის პირველი დღე
66 კგ წონით კატეგორიაში საქართველოს წარმომადგენელი არ ჰყოლია. ამ წონაში დაგეგმილი იყო ევროპის ჩემპიონის ზაზა კედელაშვილის ჭიდაობა, მაგრამ კედელაშვილი შეჯიბრის წინა დღეს თავს ჯანმრთელად ვერ გრძნობდა, არადა ”თავის” კატეგორიაში საჭიდაოდ მას წონაში კიდევ უნდა დაეკლო რამდენიმე გრამი (როგორც ჩვეულებრივ ხდება შეჯიბრებების წინა დღეებში). მწვრთნელებმა აღარ გარისკეს, გაითვალისწინეს სპორტსმენის მდგომარეობა და გადაწყვიტეს წონის დაკლების ნაცვლად, იგი ზედა წონით კატეგორიაში ეჭიდავებინათ. ზაზა კედელაშვილს თავი არც დავით ქევხიშვილის კატეგორიაში შეურცხვენია. მან ზედიზედ ოთხი შეხვედრა მოიგო, მათ შორის ესპანელ კიოში უემაცუსთან და ძიგორო კანოს ბოლო ტურნირის გამარჯვებულთან იტალიელ ფრანჩესკო ბრუიერესთან და ნახევარფინალში გავიდა, სადაც დამარცხდა ევროპის შარშანდელი ჩემპიონატის გამარჯვებულთან აზერბაიჯანელ ელნურ მამადლისთან. მესამე ადგილისთვის შეხვედრაში კი იგი ისრაელის წარმომადგენელმა იოელ რაზვოზოვმა დაამარცხა. ხოსიტაშვილმაც და კედელაშვილმაც ოლიმპიადის სალიცენზიო კლასიფიკაციაში 20-20 ქულა მოიპოვეს, თუმცა კედელაშვილს ეს ქულები დიდად არ წაადგება, რადგან იგი ლიცენზიისთვის მაინც 66 კილოგრამ წონით კატეგორიაში იბრძოლებს. 73 კგ წონით კატეგორიაში იასპარეზა ახალგაზრდა გიგა წიკლაურმაც, რომელიც პირველსავე შეხვედრაში დამარცხდა და შეჯიბრს გამოეთიშა. |